萊BLOG萊

2011年7月3日
諗住7月頭去澳門住新酒店，就一個月前打長途電話去唯一既澳門米芝蓮三星食府 - Robuchon a Galera法國餐廳訂檯，依間星級法國菜於2008年第一次食時相當滿意令人難忘(詳見這裡)，所以今次係滿有期待。

到澳門後我地先去新葡京玩左陣，有少少收穫下行去隔離葡京酒店再搭升降機上西座3樓開餐。

羅布松午餐有3款，分別係MOP398(頭盤或湯、主菜及甜品)、MOP498(頭盤、湯、主菜及甜品)及MOP638(
頭盤、湯、兩份主菜及甜品)，價錢相比2008年漲價20%，而我地照舊係揀最平既午餐同一樽水。

點餐後首先推黎既唔係麵包車，而係一位西人推住架餐酒車sell餐酒。之後送上牛油，有原味同加鹽兩種，跟住送上麵包，咦......點解唔係上次咁，推架麵包車黎問我地想食邊款？至於麵包大部份都好好味既，之後encore其中兩款麵包，但侍應竟然只拎左一款。

開胃菜係白松露蛋白配蕃茄醬，酸酸的很醒胃。

頭盤揀左"煙鵝肝伴粟米慕斯及爽滑柑橘啫喱"及"吞拿魚腩沙律配法式吞拿魚汁"，個人認為煙鵝肝同粟米唔係好夾，至於吞拿魚沙律幾清新。

主菜揀左"腹肉牛扒伴菠菜及朝鮮薊配法式伯那西醬"及"焦糖燒鵪鶉伴鵝肝及薯蓉"，兩款都幾好味，但伴碟只得薯蓉，上次食係有得揀焗薯仔。

食完主菜到甜品登場，終於同上次一樣係推架甜品車黎再逐一介紹，我地分別揀左拿破崙餅、蘋果批、菠蘿同埋熱情果芒果雪葩，拿破崙餅超好味、蘋果批普普通通、菠蘿評價好壞各一，雪葩不錯吃。

咖啡或茶

最後輪到糖果，唔係化！又係黎個拼盤就算，明明上次係推架車黎比我地揀要邊款喎......

埋單MOP915.20，午餐訂價比3年前貴左20%好合理，至少要開樽水我無問題，侍應態度差左可以算數，但服務簡化左(麵包同糖果都無推架車去面前逐一介紹比你選擇)，就令我大失所望。
上次係物超所值，今次只係物符其值，翻兜指數極低。