萊BLOG萊

2011年7月3-4日

6月見澳門銀河(GALAXY MACAU)新開張做推廣優惠，就上網訂位，係首次撇低大小朗而自己兩公婆去玩，原先想book大倉酒店(Hotel Okura)，但最後都係揀左最平既銀河酒店(Galaxy Hotel)套票MOP1,788+15%(一晚雙人房、酒店早餐及雙人上環氹仔來回船票)，之後再去信德中心出定船票。

搭8點半船出發，約70分鐘去到氹仔碼頭，因同時間得一班船所以好快就搞掂入境，之後搭接駁巴士去酒店睇下有無得提早check in。套票只得twin room就問職員有無得轉double room，佢話暫時只得一層樓有double room，但對上個層正在進行工程，我地話無所謂不過都係要2點後先安排到房間，惟有先寄存個旅行袋然後睇下搭乜車走。原來銀河酒店穿梭巴士有好多條線，包括兩個碼頭、機場、關閘、新馬路、舊城區、威尼斯人、星際酒店及新濠天地等，咁我地就搭去港澳碼頭再轉葡京巴士去新葡京，玩左陣就行番去葡京Robuchon a Galera食米芝蓮三星午餐(詳見這裡)。

食完餐大失所望既法國菜，穿過隧道經過永利行到去星際搭穿梭巴士返銀河酒店取房，間房既裝潢都幾靚，景觀係街景(另一面房間係泳池景)，最特別係浴室同卧室之間係塊透明玻璃，雖然有張膠簾可拉落黎，但奇怪既係試過拉盡都遮唔曬，最後仲整爛左個扣，另外係有wifi供應同埋冰箱入面既啤酒汽水唔駛錢。因今朝好早起身原想小睡片刻，但敵不過樓上既電鑽等裝修噪音，就決定落去行下同去賭場玩。

2011年7月3日
晏晝餐米芝蓮三星法國菜一個月前已決定左，但依日既晚餐就遲遲未有心水，我地住銀河所以諗住近近地晌返氹仔食，出發前揀左兩間食翅既，分別係譚家魚翅同埋禮記雞鮑翅。
銀河酒店有免費巴士出官也街，去到見禮記雞鮑翅唔駛等位就行入去。埋單$537無加一整體都ok既，只係我覺得除左個蠔油鮑魚汁係夠味，其他食物既味道都偏淡。

禮記雞鮑翅

2011年7月3日
諗住7月頭去澳門住新酒店，就一個月前打長途電話去唯一既澳門米芝蓮三星食府 - Robuchon a Galera法國餐廳訂檯，依間星級法國菜於2008年第一次食時相當滿意令人難忘(詳見這裡)，所以今次係滿有期待。

到澳門後我地先去新葡京玩左陣，有少少收穫下行去隔離葡京酒店再搭升降機上西座3樓開餐。

晌手信街買完手信，仲有幾成飽肚既情況下去食晚餐，地點係上次食完覺得非常回味既A Petisqueira。(上次遊記)
所揀既菜式都係上次食過既，分別係炒蜆、燒雞、燒馬介休，半渣Sangria及甜品菠蘿。雖然味道都幾好，但感覺上無第一次食咁好味，可能一來仲飽飽地，二來無左新鮮感，三來上次多人分享每樣都只食少許。埋單MOP451，飲醉食飽仲打包左大半碟燒雞。

食飽法國餐後，乘接駁巴士返碼頭，轉乘威尼斯人專車，第二次到訪諶稱全亞洲最大的威尼利人渡假村。(上次遊記)
依次黎威記只有一個目的，就係逛逛今年開張的THE MANCHESTER UNITED EXPERIENCE (曼聯專門店)。
無想像中咁多野買，雖然已唔算少，但想買條呔都無，曼聯作客波衫又無合適尺碼。原想買主場球衣(嬰兒尺碼)給萊b，不過萊嫂說等他大d識行識走先買，最後買了件長袖上衣(MOP119)，而我只買左件POLO恤(MOP229)同C7鎖匙扣仔(MOP29)。另外而家要俾MOP150先有得同彷三冠獎盃影相，仲要係星期五六日先有，而上層既博物館9月先開，講真對於今次專門店之旅都幾失望。
之後晌賭場玩左陣擺低d錢後就鬆人。

2008年4月30日
趁萊嫂既產假仲有幾日就放完，特地請左一日假，暫時撇低萊b，同萊嫂過大海輕鬆下食下好野~
上午9點幾到港澳碼頭買10點鐘船票，並買埋回程10點鐘船飛，職員話剛好剩低2張。架噴射船係新款，大架d同新整d，差唔多一個鐘就到澳門。
搭接駁巴士到葡京，時間尚早周圍行下，期間於萊嫂晌洗手間時，小弟不斷受到性感美眉"撩"，搞到好唔自在添...... : P
葡京西座3樓法國餐廳Robuchon a Galera，之前晌香港已訂好檯，我地準時12點正到達係第一檯客。午餐有三款價錢，分別係MOP328(前菜或湯及主菜)，MOP418(前菜，湯及主菜)及一款5百幾。我地要求侍應略略介紹menu上的菜式後，就決定揀最便宜既第一款。

法國餐廳Robuchon a Galera

依次去澳門玩兩日，除左食(詳見PART 1 & 2)，就係為左住威尼斯人酒店。
其實最初唔知依間野有幾巴閉，只知有間新酒店幾靚咁，同埋做特價，於是諗下邊日閒日(平d)去好，有諗過聖誕節，不過已plan左冬日之旅，最後決定不如就萊嫂牛一果日，並且好豪地book左最貴既維雅套房($1,888 + 15% Tax)，原價要3千幾蚊晚。
之後慢慢先知原來間野係大有來頭，設施點犀利賭場點龐大設備點豪華法，吸引大量市民參觀或入住，更睇到報導話前一日(9月1日) check in要排4粒鐘！

2007年9月3日
朝早九點幾晌酒店搵早餐食，food court度只有兩、三檔開左。



揀無可揀下幫趁海皇粥店
皮蛋瘦肉粥$32 + 油條$10 (香港兩倍價錢......)

2007年9月2日
萊嫂牛一，7月尾見新開張兼號稱全亞洲最大娛樂場所的威尼斯人做特價，
本著一生起碼豪一次下訂左最貴既維雅套房(1,830平方呎)慶祝。
約埋兩位朋友，再加首次見面既澳門朋友，一齊澳門萊尋食~



首站brunch去左榮輝