萊BLOG萊

2009年3月21日
OUTBACK - 太古康怡廣場
兩人共$480

今晚同萊嫂去太古城行街街，晚餐於康怡廣場OUTBACK。依間西餐廳多年前食過一次，對個碟牛扒拼阿拉斯加蟹腳有好深印象。
我地點左一杯fruit punch，一份肉眼牛扒配蟹腳及一份鮮蝦蘑菇寬條麵。扒餐跟餐湯或凱撒沙拉，並可在七款伴菜擇二，我地揀左沙拉，焗甜薯同香蒜薯蓉。首先送既麵包不錯吃；而塊扒亦好正，蟹腳啖啖肉好滿足，焗甜薯超甜，係個薯蓉麻麻；至於碟意粉普普通通，最後食剩半碟要打包。

2009年3月20日
松屋 - 銅鑼灣駱克道
每人平均$197

帥哥飯局第二回進化版，誠邀姊妹之一既ELLEN，一行四人揀左依間任飲任食港式日本料理。晚市放題時段為7點半至10點，我地早兩日訂左檯，今晚上到去見full晒唔接walk-in客。
整體食物水準不過不失，最正既係燒雞翼，任飲任食黎講算ok服務亦幾好，不過到9點半就要last order同埋單。

2009年3月6日
壽司廣 - 尖沙咀彩星大廈
二人共$473

今日係阿仔b朗生日，下午請左假出尖沙咀取蛋糕，順道於壽司廣食午餐，當慰勞萊嫂依一年既辛勞~
都有成年幾無黎過，發覺加左價，我揀左自選十六件壽司set，食物水準依然及份量十足吃到飽一飽；萊嫂就點左份自選午餐，揀左手卷+鰻魚飯+蕎麥麵，睇落唔太吸引。

2009年2月26日
備長 - 銅鑼灣恆和鑽石大廈
每人平均$230

帥哥飯局初試啼聲，揀左依間年半前食過一次lunch(這裡)既日式串燒店。
好彩之前一晚訂左檯，我地一行三人七點鐘上到去見到全部都訂晒檯，walk-in客一概唔接(直到八點幾九點)。原來星期日至四夜晚七點九前，有二十款串燒同Asahi啤酒半價，難怪金融海嘯下仍座無虛席。
我地當然主力點半價串燒，食完一round後晌時限前再要多round，最後埋尾先叫左d非特價串燒。大家依晚都飲醉食飽，大滿足是也！
服務方面除左經理哥哥有d奇怪外，侍應姐姐招呼幾好亦幾有禮貌同笑容。

2009年1月31日
陸羽茶室 - 中環士丹利街
兩人共$248

同萊嫂出中環行街，行完H&M萊嫂話試下去陸羽飲茶。
去到唔駛等位仲有卡位坐，我地係第一次幫襯，有睇今期搵食男女介紹真正灌湯餃，再要個荷葉飯，蝦餃同以為係棉花雞。三款點心都好味，荷葉飯就普普通通，好間唔中黎飲下茶都唔錯。

2009年1月29日
北京酒樓 - 佐敦彌敦道
十人共$1,520

友好新春開年飯局，見依間有位便決定一試老牌北京菜，一行十大一細點左個八至十位用套餐。
套餐份量都幾多，至於食物味道就有好有唔好，但因要做兩輪檯生意(六點半同八點半)，所以上菜速度好趕，逼住要快食。另外服務方面可以話係無服務，個人翻兜既機會唔大喇。

2009年1月24日
Ruby Tuesday - 沙田新城市廣場
每人平均$137

好友團年飯鼠年最終回，地點揀左沙田Ruby Tuesday，全因maymay入左會有折扣咭。
我地一行六大一細一坐低唔係點野食，而係派/收禮物時間，好開心今日又滿載而歸~ 講番食物味道幾唔錯，不過因一次過黎晒，搞到有d會凍左無咁好味，當然最緊要係有半價，好抵食呢~

2009年1月18日
近又千層黑豚專賣店 - 旺角朗豪坊
二人共$293

放學約左萊嫂帶埋b朗晌旺角朗豪等，萊嫂見依間新開唔駛等位，又算坐得舒服同知道我鐘意食日本野，所以就試下。
同係吉列專門店，好自然會同DON吉比，依間價錢比較平，而d芝麻已經磨碎唔駛自己搞。食物方面炸豬排同炸蠔都好得，但炸蝦就唔多新鮮，而白飯同椰菜都ok，麵豉湯仲幾好味添。
近我公司加上價錢ok又唔駛等位，會再幫襯~