2011年7月3-4日


6月見澳門銀河(GALAXY MACAU)新開張做推廣優惠,就上網訂位,係首次撇低大小朗而自己兩公婆去玩,原先想book大倉酒店(Hotel Okura),但最後都係揀左最平既銀河酒店(Galaxy Hotel)套票MOP1,788+15%(一晚雙人房、酒店早餐及雙人上環氹仔來回船票),之後再去信德中心出定船票。

搭8點半船出發,約70分鐘去到氹仔碼頭,因同時間得一班船所以好快就搞掂入境,之後搭接駁巴士去酒店睇下有無得提早check in。套票只得twin room就問職員有無得轉double room,佢話暫時只得一層樓有double room,但對上個層正在進行工程,我地話無所謂不過都係要2點後先安排到房間,惟有先寄存個旅行袋然後睇下搭乜車走。原來銀河酒店穿梭巴士有好多條線,包括兩個碼頭、機場、關閘、新馬路、舊城區、威尼斯人、星際酒店及新濠天地等,咁我地就搭去港澳碼頭再轉葡京巴士去新葡京,玩左陣就行番去葡京Robuchon a Galera食米芝蓮三星午餐(
詳見這裡)。

食完餐大失所望既法國菜,穿過隧道經過永利行到去星際搭穿梭巴士返銀河酒店取房,間房既裝潢都幾靚,景觀係街景(另一面房間係泳池景),最特別係浴室同卧室之間係塊透明玻璃,雖然有張膠簾可拉落黎,但奇怪既係試過拉盡都遮唔曬,最後仲整爛左個扣,另外係有wifi供應同埋冰箱入面既啤酒汽水唔駛錢。因今朝好早起身原想小睡片刻,但敵不過樓上既電鑽等裝修噪音,就決定落去行下同去賭場玩。








晌賭場玩左陣就搭穿梭巴士去威尼斯人,4年前新開張時住過一晚(
詳見這裡),今時今日都仍然係勁多人,而今次去威記既目標只得一個,就係去曼聯專門店逛下,雖然最終乜都無買到,但驚喜既係第一次去到樓上果層同影左唔少相。之後搭巴士返銀河再轉車去官也街食晚飯(詳見這裡)。




食飽返酒店,見有六位泰國"美女"排排企同大家影相,之後又再去賭場玩,跟住返房間睇陣電視(變身男女chok第一集勁好笑)就休息,但鄰房班細路此時持續地喪玩大笑尖叫,因同鄰房係有度門相連所以好應聲,只好打電話去櫃檯叫職員跟進,最後等多兩、三個字先無再嘈,可以訓番覺好。







第二朝7點就起身,梳洗後落去「群芳」食原價每位MOP168既自助早餐,食物款式種類非常多,至於味道就普普通通。



抖左陣就去「天浪淘園」游水,除左泳池賣點係有個人工沙灘同埋沖浪池,輕輕鬆鬆游下浸下水都幾爽。






因為待在家的大朗持續輕微發燒,原本訂左5點船不過都決定食埋個晏就返香港,check out後晌賭場臨別秋波就搭穿梭巴士出官也街。




原本今日午餐係book左米芝蓮一星意大利餐廳奧羅拉Aurora,但見尋日兩餐同今朝早餐都食得好豐富,加上想早d返香港,所以買左手信後就隨意入左間茶餐廳格局既「咖哩全」,埋單$71,當中唔係咁多地方食到既雞腳麵最得我心,至於個咖哩就好鬼辣食到成頭汗。食飽就搭的士去碼頭搭1點半船走人,結束兩日一夜之旅。





講番間銀河酒店我地都覺得相當唔錯,房間配套幾好,起碼個花灑水勢夠勁同d水一開就熱,免費啤酒汽水同wifi供應都令人有好既印象,穿梭巴士路線齊全,最後套票價錢亦算划算。
唔知黎緊澳門仲有無新既大型酒店落成呢?

創作者介紹
創作者 royyahooblog 的頭像
royyahooblog

萊BLOG萊

royyahooblog 發表在 痞客邦 留言(4) 人氣()


留言列表 (4)

發表留言
  • Ellen
  • 我like玻璃洗手間!哈哈!
    [版主回覆08/03/2011 21:29:04]咁你like俾人睇定係睇人沖涼先~
  • Meloching
  • 我地住君怡,去官也街夠方便!咦!你咁快upgrade去新的yahoo blog,你覺得OK嗎?
    [版主回覆07/30/2011 15:40:10]尋日update左,好多野唔同左,blog友無晒,舊blog link全部無效,blog內容版面走晒位,弊多於利......
  • Meloching
  • 咦?我地都有幫襯咖哩全,我估我地比你地早幾個鐘在那裡食咖哩,D咖哩我覺得都幾惹味!
    [版主回覆07/26/2011 09:55:00]咁"0岩"既~ 你地住邊間酒店呀?
  • supageti
  • 唔明點解依家啲酒店梗係要整玻璃洗手間 ~~~
    [版主回覆07/26/2011 09:51:00]間間都係咁架? 依間連個廁所都係透明玻璃門,好open呀~