2008年4月30日
趁萊嫂既產假仲有幾日就放完,特地請左一日假,暫時撇低萊b,同萊嫂過大海輕鬆下食下好野~
上午9點幾到港澳碼頭買10點鐘船票,並買埋回程10點鐘船飛,職員話剛好剩低2張。架噴射船係新款,大架d同新整d,差唔多一個鐘就到澳門。
搭接駁巴士到葡京,時間尚早周圍行下,期間於萊嫂晌洗手間時,小弟不斷受到性感美眉"撩",搞到好唔自在添...... : P
葡京西座3樓法國餐廳Robuchon a Galera,之前晌香港已訂好檯,我地準時12點正到達係第一檯客。午餐有三款價錢,分別係MOP328(前菜或湯及主菜),MOP418(前菜,湯及主菜)及一款5百幾。我地要求侍應略略介紹menu上的菜式後,就決定揀最便宜既第一款。


法國餐廳Robuchon a Galera



室內裝潢



落左order後,侍應首先推出一部放滿各種麵包的餐車,然後就每款麵包作介紹及問我地想食邊d款,花多眼亂下及唔知邊款好味,決定由她發版。等左陣熱辣辣麵包送上,大部份都好好味,之後更再要多幾個。



食緊麵包時送上開胃菜,係芝士配蕃茄醬,酸酸地果然好醒胃!



前菜有3款,分別係蟹肉伴海鮮啫哩,鵝肝醬伴薯仔及烚蛋配黑松露。我地揀左蟹肉同鵝肝醬,兩款都ok。



主菜有6款選擇,3款係魚分別係鱸魚,龍利魚及銀鱈魚;肉亦有3款分別係羊架,燒春雞及牛扒。我揀左牛扒,原先話要7成熟,之後侍應話廚師建議半生熟會最好,因牛扒屬於腰肉,7成會太熟,而萊嫂就揀春雞。塊牛扒好有牛味,5成熟亦剛剛好;春雞就非常嫩滑,兩碟既配汁好配合,附上既薯仔同薯蓉亦好好味。




主菜後輪到甜品,同頭先麵包一樣,亦係推出架放滿各式甜品的餐車,亦係有逐一作介紹,每人可揀2款甜品加1款雪糕或雪芭。我揀左拿破崙餅,焗蛋白及橙味雪糕,萊嫂揀冧酒蛋糕,檸檬批及菠蘿雪芭。



咖啡或茶



就在以為食完之際,侍應推出一架放滿糖果,巧克力及曲奇餅的餐車,然後又係逐款作介紹。這次亦由她發版,只係要求要一支花花波板糖,影起相黎會靚d。




其實上年9月到澳門時已想惠顧依間聞名已久既葡京法國菜,不過果時訂唔切檯,所以今次差唔多一個月前就打IDD訂位。埋單MOP721.60,即每人3百幾蚊,雖然未致於非常好味及每款都合心水,但依個價錢食到米芝蓮3星廚師既手藝,加上餐廳既裝潢及環境,同殷切既服務,簡直係超抵!


p.s. 葡京既洗手間自動門相當新奇~

arrow
arrow
    全站熱搜

    royyahooblog 發表在 痞客邦 留言(0) 人氣()