萊BLOG萊

2008年10月10日
北海道十勝豚丼 - 旺角通菜街
每人$61

睇搵食男女介紹依間新店點正點打正旗號賣日本豚丼(豬扒飯)，今日lunch搵埋同事去試下，去到要等位不過都只係等幾分鐘。
主角豚丼有四款，仲有其他定食、小食等，我揀左厚燒豬扒飯定食，同事揀滑蛋豬扒飯定食，定食$58包凍豆腐同蜆仔麵鼓湯，加$3有杯汽水或檸茶。
等左大概十分鐘，滑蛋豬扒飯定食送上，之後諗住等埋我個厚燒豬扒飯黎到撈埋一齊試下，點知等多十分鐘都唔見，惟有拎個碗仔夾左兩塊豬扒同少少飯試，嗯.....塊豬扒都幾乾，唔覺有乜肉汁，而炸漿"稔"既，都算喇依樣可能係等耐左，但一碗丼既靈魂即係飯，唉，好失望囉，依d疑似日本飯絕對滿足唔到我，勉強係個蛋汁算幾香。
前後等左三十分鐘我個厚燒先黎，大佬呀，我得一粒鐘時間食lunch咋，同埋最慶係左右隔離遲過我落order既都到先過我。講返塊豬扒都係幾乾，係個燒汁叫做ok，之後拿拿臨"爬"晒碗飯，食埋個好差既凍豆腐，飲埋碗淡茂茂既麵鼓湯就埋單走人趕返公司。