2009年7月6日
湖舟 - 銅鑼灣渣甸中心
兩人共$512


慶生飯第二回,因為想食靚d既壽司所以揀左湖舟,七點半上到去見到只得兩、三檯客,場面比以往冷清。
打開menu睇下有乜熟食適合萊嫂,晌選擇唔多既情況下揀左雜錦天婦羅($145)加飯set($40),而我就一早決定要特上壽司($280)。原本想飲杯酒增慶一下,但見到最平既梅酒都要$100杯,咁貴不如飲啤酒算,但menu上寫飲酒要硬食前菜$30,咪即係飲杯啤酒都要$70!都係飲茶吧喇......
睇緊menu時隔鄰檯有人入座,一望原來係好幾年前晌依絲吐認識既W,諗番起都多年無見,亦即時醒起咁轎我同佢都揀左黎依間食日本野慶祝生日!寒喧一番後原來W已係兩子之母,兩個仔相隔年半,同我地既情況一樣,真係轎上加轎~
我份特上壽司先到,一睇唔係化?碟上既六件卷物都係醃蘿蔔卷!明明食開都係鐵火卷(吞拿魚)架,你咁樣好趕客喎,而壽司亦無左出面少食到既燒牛肉......
壽司味道方面都keep到既,係件北寄貝麻麻地新鮮,但一食件海膽壽司,嘩...乜苦既!而家唔係將貨就價到咁緊要呀?至於萊嫂既天婦羅,個脆漿偏硬,刻薄d講句仲差過出面港式日本料理賣幾十蚊份既。
雖然話個師父調左去第度,但d野都唔駛差過以前咁多呀?唔怪得到走時都坐唔滿一半客,同往時爆晒棚係兩回事,咁搞法遲早執笠,真係非常非常失望,亦令到依餐慶生飯相當唔滿足同唔滿意。















漏影甜品綠茶雪糕

創作者介紹
創作者 royyahooblog 的頭像
royyahooblog

萊BLOG萊

royyahooblog 發表在 痞客邦 留言(0) 人氣()