澳門萊尋食2011 - PART 3 @ 萊BLOG萊

2011年7月3-4日

6月見澳門銀河(GALAXY MACAU)新開張做推廣優惠，就上網訂位，係首次撇低大小朗而自己兩公婆去玩，原先想book大倉酒店(Hotel Okura)，但最後都係揀左最平既銀河酒店(Galaxy Hotel)套票MOP1,788+15%(一晚雙人房、酒店早餐及雙人上環氹仔來回船票)，之後再去信德中心出定船票。

搭8點半船出發，約70分鐘去到氹仔碼頭，因同時間得一班船所以好快就搞掂入境，之後搭接駁巴士去酒店睇下有無得提早check in。套票只得twin room就問職員有無得轉double room，佢話暫時只得一層樓有double room，但對上個層正在進行工程，我地話無所謂不過都係要2點後先安排到房間，惟有先寄存個旅行袋然後睇下搭乜車走。原來銀河酒店穿梭巴士有好多條線，包括兩個碼頭、機場、關閘、新馬路、舊城區、威尼斯人、星際酒店及新濠天地等，咁我地就搭去港澳碼頭再轉葡京巴士去新葡京，玩左陣就行番去葡京Robuchon a Galera食米芝蓮三星午餐(詳見這裡)。

食完餐大失所望既法國菜，穿過隧道經過永利行到去星際搭穿梭巴士返銀河酒店取房，間房既裝潢都幾靚，景觀係街景(另一面房間係泳池景)，最特別係浴室同卧室之間係塊透明玻璃，雖然有張膠簾可拉落黎，但奇怪既係試過拉盡都遮唔曬，最後仲整爛左個扣，另外係有wifi供應同埋冰箱入面既啤酒汽水唔駛錢。因今朝好早起身原想小睡片刻，但敵不過樓上既電鑽等裝修噪音，就決定落去行下同去賭場玩。

晌賭場玩左陣就搭穿梭巴士去威尼斯人，4年前新開張時住過一晚(詳見這裡)，今時今日都仍然係勁多人，而今次去威記既目標只得一個，就係去曼聯專門店逛下，雖然最終乜都無買到，但驚喜既係第一次去到樓上果層同影左唔少相。之後搭巴士返銀河再轉車去官也街食晚飯(詳見這裡)。

食飽返酒店，見有六位泰國"美女"排排企同大家影相，之後又再去賭場玩，跟住返房間睇陣電視(變身男女chok第一集勁好笑)就休息，但鄰房班細路此時持續地喪玩大笑尖叫，因同鄰房係有度門相連所以好應聲，只好打電話去櫃檯叫職員跟進，最後等多兩、三個字先無再嘈，可以訓番覺好。

第二朝7點就起身，梳洗後落去「群芳」食原價每位MOP168既自助早餐，食物款式種類非常多，至於味道就普普通通。

抖左陣就去「天浪淘園」游水，除左泳池賣點係有個人工沙灘同埋沖浪池，輕輕鬆鬆游下浸下水都幾爽。

因為待在家的大朗持續輕微發燒，原本訂左5點船不過都決定食埋個晏就返香港，check out後晌賭場臨別秋波就搭穿梭巴士出官也街。

原本今日午餐係book左米芝蓮一星意大利餐廳奧羅拉Aurora，但見尋日兩餐同今朝早餐都食得好豐富，加上想早d返香港，所以買左手信後就隨意入左間茶餐廳格局既「咖哩全」，埋單$71，當中唔係咁多地方食到既雞腳麵最得我心，至於個咖哩就好鬼辣食到成頭汗。食飽就搭的士去碼頭搭1點半船走人，結束兩日一夜之旅。