萊BLOG萊

2009年1月13日
西苑酒家 - 銅鑼灣恩平道
每人平均$220

友好團年飯聚Special，一行六人包括有初次見面的小頭，上到出名唔平既西苑酒家，打電話訂檯時已訂落半隻琵琶鴨，再每人揀一款菜式。
大哥叉燒聞名已久，終有機會試到，不過可能俾左d好瘦既位置我地，我覺得麻麻地，下次有機會既話要指定要肥叉。除左碟燒鱔乾左d，其他菜式同個湯都唔錯，不過價錢就真係偏高左d。
隔離飯香，席間不斷聞到好香既豉油皇香味、者者煲香味、臘味飯香味等，引到我地流晒口水......

2009年1月10日
火湯匯 - 銅鑼灣駱克道
每人平均$200

友好飯聚提早團年兼取日遊手信，地點一改再改下最終黎依間火湯匯打邊爐。
見個價錢都幾唔平，不過碌匯豐信用卡有八折，就決定括出去。我地六個人分兩輪，唔覺唔覺點左十幾碟野，整體黎講都算OK。

2008年12月28日
Ruby Tuesday - 沙田新城市廣場
兩人共$370

星期日出沙田睇show，早一晚問定沙田友新城市有乜好介紹，佢話依間美式餐廳搬左新店可以試下，記得晌銅鑼灣食過一次都唔錯，一於揀佢，點知打電話訂檯竟然覆話夜晚fully booking，咁惟有食晏晝啦。
去到發現原來sell緊入會package，有最多半價優惠，唔怪得夜晚full晒啦，我地考慮左一陣都係決定慳番唔join。食物味道都ok，不過真係幾唔平，如果有半價就會好抵。

2008年12月13日
品潮樓 - 尖沙嘴金馬倫道
每人平均$150

與友好冬至飯局，順便交換聖誕禮物，雖然人唔齊及地點一改再改，但無損大家既雅慶。

2008年12月13日
和三昧 - 銅鑼灣軒尼詩道
兩人共$748

早兩日已plan星期六趁放假得閒出梳哥行下，順道豪一豪去食和三昧，並打電話book檯。去到被安排坐於房內，翻開lunch menu發覺好似加左價，我地早已決定要兩人龍蝦餐($680+10%)。
我同萊嫂食過幾次和三昧，覺得今次個銀雪魚同鵝肝都差左，杯雪糕細左，但個龍蝦麵豉湯就超好味，其他既都keep到水準。

2008年12月6日
太平館餐廳 - 尖沙嘴加連威老道
三人共$460

今日同埋印印帶b朗出尖咀，午餐揀就近既太平館，我地點左個二人餐再加碟咖哩石班飯。太平館都幫襯過好幾次，偶爾都會黎豪一豪佢。

2008年11日30日
鹿鳴春 - 尖沙咀麼地道
八人共$1,8XX

老媽子生日，家姐提議到鹿鳴春，我當然舉腳贊成，半個月前便打電話訂檯。
我一家連印印，加埋家姐一家共八大一bb，被安排坐於最入位置(可能早訂檯)，依度無出面咁嘈同逼。除左佢地點名要試賽螃蟹，同大家一致要試雞煲翅($650)，其餘由我發辦，最後都係點d大路野。
加埋啤酒汽水埋單一千八百幾，即除開每人二百幾，唔算貴。

2008年10月18日
八王子拉麵館 - 油麻地白加士街
三人共$134

又係睇搵食男女介紹依間以獨特牛骨湯底招徠既拉麵店，豬骨、醬油、鹽，味噌等湯底既日本拉麵都食過，所以好有興趣試試。
中午帶埋b朗同印姐姐一行四人坐小巴去，初頭以為係佐敦果面但原來係近油麻地。我地要左八王子拉麵、元祖激辣拉麵，牛油粟米拉麵同一罐可樂，拉麵黎到當然係試下個湯先，嗯...咁淡既，之後試埋麵、叉燒，蛋同粟米，依d都ok喎。
始終一碗日本拉麵既靈魂係湯底，但依間既主打牛骨湯底實在係太清淡，唔係好適合配拉麵......不過餐牌上都有正常d既豬骨，醬油同味噌湯底，加上只係40蚊碗唔算貴，有機會反兜試其他。

2008年10月10日
北海道十勝豚丼 - 旺角通菜街
每人$61

睇搵食男女介紹依間新店點正點打正旗號賣日本豚丼(豬扒飯)，今日lunch搵埋同事去試下，去到要等位不過都只係等幾分鐘。
主角豚丼有四款，仲有其他定食、小食等，我揀左厚燒豬扒飯定食，同事揀滑蛋豬扒飯定食，定食$58包凍豆腐同蜆仔麵鼓湯，加$3有杯汽水或檸茶。
等左大概十分鐘，滑蛋豬扒飯定食送上，之後諗住等埋我個厚燒豬扒飯黎到撈埋一齊試下，點知等多十分鐘都唔見，惟有拎個碗仔夾左兩塊豬扒同少少飯試，嗯.....塊豬扒都幾乾，唔覺有乜肉汁，而炸漿"稔"既，都算喇依樣可能係等耐左，但一碗丼既靈魂即係飯，唉，好失望囉，依d疑似日本飯絕對滿足唔到我，勉強係個蛋汁算幾香。
前後等左三十分鐘我個厚燒先黎，大佬呀，我得一粒鐘時間食lunch咋，同埋最慶係左右隔離遲過我落order既都到先過我。講返塊豬扒都係幾乾，係個燒汁叫做ok，之後拿拿臨"爬"晒碗飯，食埋個好差既凍豆腐，飲埋碗淡茂茂既麵鼓湯就埋單走人趕返公司。

2008年10月6日
杭州酒家 - 灣仔莊士敦道
每人平均$225

友好飯局，今次由我發版揀左依間近排幾紅既杭州酒家，其實幾年前有朋友帶我黎食過，個時並唔知係咁出名。訂檯時問左富貴雞同火瞳老鴨湯要訂，咁一於就訂依兩款試下啦。
食物味道有得有唔得，但同檯友人普遍認為麻麻，最深刻既係炸超臭豆腐，係我食過咁多年炸臭豆腐最臭既，難為晒唔食既友人......
席間見到早兩日電視先見過既第一代私房菜既劉健威。

2008年9月27日
板前壽司 - 旺角家樂坊
五人共約$400

同萊嫂出旺角睇戲，之前睇報紙廣告板前板長做青森縣藍鰭吞拿魚推廣，好吸引想試下，另外咁0岩家姐出旺角睇電器，咁就一齊去板前食壽司。
嗯......都食過板前好幾次，迴轉壽司都係峰0岩我多d~

2008年9月15日
大戶屋 - 康怡吉之島
兩人共$208

一直想試依間人氣新店，趁中秋翌日假期帶埋b朗一早去康怡順道行下吉之島同Apita，十一點幾去到都要等差唔多二十分鐘先有位。
點左兩份定食同沙拉，味道都ok既。

2008年9月12日
寧波旅港同鄉會餐廳 - 中環德己立街
每人平均$155

與友好們家好月圓慶中秋，選擇返兜過年時食過既寧波同鄉會，今次無乜點d貴菜式，大家嘻嘻哈哈食一餐共度中秋實在不亦樂乎~~

2008年9月2日
La Bouteille - 中環皇后大道中
兩人共$930

萊嫂生日，揀依間早前"搵食男女"介紹既法國私房菜慶祝。
依間La Bouteille係食course，$350有餐前小吃、蝦咯嗲、磨菇湯、煎鵝肝、主菜，士多啤梨乳酪及甜品。主菜有五款揀，有大蝦配沙拉、春雞伴鵝肝雲吞、油浸鴨腿(加$50)，牛扒及羊架(加$30)，甜品有四款揀，有橙雪葩、焦糖燉蛋，熱情果餅及朱古力軟心蛋糕伴雪糕。
食物味道唔係話好特別，環境尚可不過碰正一班好嘈吵既港女就大煞風景，服務亦同"搵食男女"所講既係兩回事，總結黎講係有d失望既。

2008年8月31日
PASTA de WARAKU - 荃灣荃新天地
兩人共$214

b朗既向新界出發今日係去荃灣，逛下依個自稱香港六本木既荃新天地。
之前睇左劉鄧blog介紹依間意粉店好想試下，揀左一份pizza餐，一碟蟹肉奶油意粉及一杯凍latte。
先黎個pizza餐，有湯、沙拉，細pizza同意粉(指定十幾款中揀，我地揀拿破崙香腸意粉)，食晒等左陣碟蟹意粉都未黎，於是叫侍應追追，點知追完返黎話賣晒，有無搞錯等左成半粒鐘仲要追先話賣晒！最後改左要海鮮蕃茄奶油意粉。
講真意粉味道唔算正，勝在款式超多令人目不暇給。

2008年8月30日
岩浪 - 銅鑼灣恆和鑽石大廈
兩人共$253

好耐無出銅鑼灣，趁星期六撇低b朗同萊嫂去行街街。
想食日本野，諗起依間岩浪有天婦羅又有壽司食，去到翻開餐牌，發現食開既自選餐無加到價，一於要番自選天婦羅set($110+10%)同自選壽司set($120+10%)。
如分開計，依間既天婦羅同壽司未算最好，但咁既價錢有得自選加同時食到兩樣野，合晒我心水~

2008年8月16日
喜來登酒店 The Café  - 尖沙咀彌敦道
免費

早排晌花旗做左個私人貸款所送既Tea Buffet，見今個禮拜六得閒d就食左佢，原來正價要每人$218+10%，而依期個甜品主題係士多啤梨。
冷盤熱葷選擇唔多兼味道麻麻，係叫做甜品款式多d，如果要自己俾錢就真係唔駛旨意......(以下係兩人份量)

2008年8月15日
有骨氣 - 長沙灣順寧道
兩人共$431

叫做趕完dead-line，準時收工同萊嫂去烚下烚下。
幫襯過有骨氣好幾次，不過對上果次晌尖咀店覺得麻麻，今次當係比多次機會佢。未夠七點去到係第一檯客，先整支特價生力飲，依期係匯豐咭做優惠，不過我地無只得星展咭有九折。
其實最主要係飲個蕃茄湯，今次保持番水準，其他配料不過不失。

2008年8月9日
RUTH'S CHRIS STEAK HOUSE - 金鐘力寶中心
兩人共$627

同萊嫂行完BB展，搭巴士落金鐘搵野食，見到有間Steak House諗住鋸下扒。
入到去發覺唔對路，完全係高級餐廳款，之前睇過友Blog，依間咪係夜晚兩個人要成千幾蚊落樓果間......
不過既然入左去，同埋Lunch應該平一截既情況下，就豪一次啦！
揀左兩個較平既主菜，烤牛肉大菇沙拉($200)及6安士牛柳($260)，主菜加$50可湯，沙拉及配菜三揀一及咖啡茶，我地就加左龍蝦湯(要再加$10)同芝士西蘭花。

2007年7月26日
Te - 九龍灣Mega Box
兩人共$126

九龍灣Mega Box自新開張時只去過一次，因幾吊腳同無乜野吸引我，直到早前見宣傳有叮噹活動，咁橫掂要去睇不如順便去埋IMAX睇蝙蝠俠，原先係想上禮拜六去不過上網買唔切飛，要等到今個星期六。
初時仲以為IMAX係要戴3D眼鏡，原來只係闊銀幕，套戲我就覺得幾好睇同緊湊，只不過阿小丑實在太神通廣大，搞到個個差人都係無間道，女主角似阿禫，而萊嫂就唔太鍾意。
睇完戲搵野食，行過Te我D意粉癮發作，之前又係新開時只晌海港城幫襯過，覺得都幾唔平，Mega Box依間包埋野飲好似抵D(定係其實間間都包野飲？)。