2009年9月29日
東來順 - 尖東帝苑酒店
每人平均$260
與友好中秋聚餐,地點揀依間位於酒店地庫的京菜食府。
此店價錢偏高環境舒適,個人認為片皮鴨最好味,其他食物味道普通,服務就有好大既進步空間。
祝願大家中秋節開開心心~
2009年9月29日
東來順 - 尖東帝苑酒店
每人平均$260
與友好中秋聚餐,地點揀依間位於酒店地庫的京菜食府。
此店價錢偏高環境舒適,個人認為片皮鴨最好味,其他食物味道普通,服務就有好大既進步空間。
祝願大家中秋節開開心心~
2009年9月6日
容龍海鮮酒家 - 屯門青山公路
每人平均$290
應邀劉鄧飯局,搭西鐵再轉車黎到容龍,依稀記得好好細個時有黎過依度玩,而家既容龍海鮮酒家就第一次黎。
多謝劉鄧同maymay各帶來紅酒,白酒同日本桃酒,有美酒配佳餚實是一樂也。是晚海鮮由酒家發辦,據劉鄧講原本安排左八道海鮮,不過有象拔蚌無貨同埋臨時有人事忙缺席,所以只點了六道海鮮菜式,之後再加碟炒菜。
依晚大家都飲醉食飽,希望快d會再搞得成海鮮宴,我想食椒鹽瀨尿蝦、炒蟶子、象拔蚌、帶子、中蝦等等等等......
2009年9月5日
The StoneGrill - 尖沙嘴海港城
兩人共$234
未幫趁過StoneGrill因見價錢都幾貴,但當早前得悉citibank信用咭有半價午餐優惠,就急不及待想試,原先book左8月中去食,不過細b早左出世,一直等到今日先同萊嫂去撐檯腳。
食物味道不俗,服務亦幾好,以每人唔駛百二蚊黎講我覺得相當抵~
2009年9月2日
C'est Bon - 青衣城
兩人共$788
萊嫂生日,近近地揀左依間青衣城法國菜慶祝。
本身於曼谷好出名食法國九道菜套餐既,記得初晌香港開張時曾慕名幫趁過,當時印象普普通通,事隔四年再俾次機會佢。
萊嫂揀$368黑松露菌套餐,我就照舊要$268九道菜套餐,一份主菜轉牛扒加$50,仲有要左杯$30紅酒。
餐廳氣氛唔錯,服務就除左經理cool d外,其餘都幾好,食物味道正正常常不過不失,相信再黎都可能又係幾年後既事。
2009年7月6日
湖舟 - 銅鑼灣渣甸中心
兩人共$512
慶生飯第二回,因為想食靚d既壽司所以揀左湖舟,七點半上到去見到只得兩、三檯客,場面比以往冷清。
打開menu睇下有乜熟食適合萊嫂,晌選擇唔多既情況下揀左雜錦天婦羅($145)加飯set($40),而我就一早決定要特上壽司($280)。原本想飲杯酒增慶一下,但見到最平既梅酒都要$100杯,咁貴不如飲啤酒算,但menu上寫飲酒要硬食前菜$30,咪即係飲杯啤酒都要$70!都係飲茶吧喇......
睇緊menu時隔鄰檯有人入座,一望原來係好幾年前晌依絲吐認識既W,諗番起都多年無見,亦即時醒起咁轎我同佢都揀左黎依間食日本野慶祝生日!寒喧一番後原來W已係兩子之母,兩個仔相隔年半,同我地既情況一樣,真係轎上加轎~
我份特上壽司先到,一睇唔係化?碟上既六件卷物都係醃蘿蔔卷!明明食開都係鐵火卷(吞拿魚)架,你咁樣好趕客喎,而壽司亦無左出面少食到既燒牛肉......
2009年7月6日
吉地士 - 半島酒店
兩人合共$942
慶生飯想食豪d,自然會諗起法國菜,加上趁萊嫂生細b之前食番餐好。本來想試香港Robuchon,不過見開飯dotcom食評麻麻,之後search一輪見依間Gaddi's幾吸引,一於試下。
應dresscode要求著番恤衫西褲到場,餐廳裝飾都幾富麗堂皇。坐低無耐就送上麵包,只得四款揀同埋係唔熱既。之後侍應拎黎menu簡單介紹有單品,午餐set同黑松露菌菜式,我地一早已鎖定係食最平既午餐set。
午餐set($428+10%)有頭盤,主菜和甜品,每樣都有四款選擇,再包一杯飲品及最後既咖啡茶。雖然menu上有英文,但有d都唔知係乜黎,所以要勞煩侍應哥哥逐一講解。頭盤有兩個前菜,一個熱湯同一個凍湯;主菜有煎魚、焗魚,燒牛肉同兔仔髀;甜品有燉梨雪葩、雜果碟,櫻桃塔開心果雪糕同精選法國芝士。
整體食物味道除左塊牛扒好得外,其他都無乜特別;服務方面亦唔見殷勤,最唔滿意係無主動幫我地加咖啡同茶,要出聲先有。總結係好懷念澳門葡京法國菜......
2009年6月26日
真串 - 中環卑利街
每人平均$210
依晚帥哥飯局誠邀活躍於飲食界既小Q同小頭兩夫婦,可惜有人因提早放暑假太開心以致發燒不能出席。小Q小頭同兩位帥哥四人作先頭部隊於六時侵佔串燒鋪,小弟收工較晏要七點鬆d先到達會合。
第一次同小Q同檯食飯,估唔到原來相當健談,叫野食時亦好豪氣爽快。
以下除左前菜,食物同啤酒晌Happy Hour時段都係10蚊(+10%)一串/罐,串燒既質量同味道無因為係10蚊雞而將貨就價,燒雞翼同牛助骨肉都好好味,其他亦不俗,值得翻兜。只係尾段事頭婆出黎狂炳伙計有點煞風景。
2009年6月25日
方榮記 - 九龍城侯王道
兩人共$413
前一晚忽然想打邊爐,見依日會晌新浦崗收工,所以就約萊嫂落九龍城打邊爐,地點揀左以沙爹湯底聞名既方榮記。
湯底當然係揀沙爹湯,再要左澳洲和牛、黑豚肉、炸魚皮、四寶丸、支竹,生菜拼通菜及一渣酸梅湯同一支可樂。彈既係覺得個湯底淡過以前,炸魚皮好硬,d菜幾污糟,酸梅湯淡茂茂。初頭仲諗住整個丁麵配沙爹湯,點知最後竟然食剩半碟牛肉要打包......
2009年4月13日
古酒家 - 尖沙咀金馬倫道
每人平均$395
留港消費的友達趁長假結束前黎個晚餐放題,依間主打沖繩料理既古酒家新推出$288和牛+蟹任食晚餐,個半鐘內和牛火鍋,松葉蟹同其他日本食品任食。
主角和牛同松葉蟹水準甚高,其他食物就有得有唔得,不過限住時間食就真係幾趕(九十分鐘內落order,之後有多三十分鐘食野),大家完全無停過手。
2009年4月10日
niji bistro - 尖沙咀海港城
每人平均$154
復活節留港消費振興經濟,與友人來個迷李飯局,友人提議了三間餐廳,見依間niji bistro以蛋包飯掛帥,決定一試。事緣自從睇過日劇「午餐女王」後,對蛋包飯(庵列飯)會特別留意,可惜晌香港甚少吃到合心意既。
我地見優惠分別有湯、沙拉、甜品半價,特定晚餐送餐酒一杯,及含酒精類飲品買一送一,所以豪不客氣地點了一檯食物並每人要了一杯紅酒。
主打蛋包飯有期望所以有失望,相反碟凍意粉就好有驚喜,湯同沙拉都唔錯,可惜信錯某君以致無緣一試焦糖原味布甸。以每人百幾蚊,坐得舒舒服服食物亦唔差仲飲埋紅酒,再加所用餐具大部份係日本品牌,我地都好滿意lu。
2009年3月30日
Kitchen, W Hotel - 尖沙咀九龍站
每人$360 (折扣後)
除左每年公司既聖誕餐聚,平時絕少到酒店食自助晚餐,前陣子睇搵食男女介紹依間新開型格酒店,新推有主菜既dinner buffet ($399 +10%),價錢接受到便相約友人一試,最終連我一行五人一齊去做白老鼠~
首先講酒店既裝潢,又真係幾新穎幾型,餐廳環境幾舒適,而侍應姐姐服務都ok,食物選擇唔多,味道有好有唔好;要彈既係食物準備方面,吞拿魚成抽切唔斷,"畢"野食既餐具揩左d醬遲遲都無抹,抹又求求其其,open kitchen廚帥有d怠慢等等。
同檯友人似乎都唔太滿意依餐,可幸既係意粉師姐有手信派,同最重要係maymay用中銀白金卡埋單有八折!慳番d錢夠搭的士返歸~
2009年3月28日
見城 - 尖沙咀赫德道
每人平均$187
朝早於九龍公園打羽毛球,有波友提議去見城食晏,有波友就話唔鍾意本店女將既態度,所以決定去試下新店。以前幫襯過本店幾次lunch都係叫自選壽司set,今次都無例外,同檯友儕亦一致要自選壽司set ($170+10%)。
套餐先黎個日式蒸蛋,不過大家都評價麻麻;之後到主角壽司登場,咦乜細件左既.....味道同新鮮程度我就覺得都好似差左;至於個麵豉湯同雪糕亦都係爭咁d咁......惟一可讚既係店員姐姐服務不錯。
2009年3月21日
OUTBACK - 太古康怡廣場
兩人共$480
今晚同萊嫂去太古城行街街,晚餐於康怡廣場OUTBACK。依間西餐廳多年前食過一次,對個碟牛扒拼阿拉斯加蟹腳有好深印象。
我地點左一杯fruit punch,一份肉眼牛扒配蟹腳及一份鮮蝦蘑菇寬條麵。扒餐跟餐湯或凱撒沙拉,並可在七款伴菜擇二,我地揀左沙拉,焗甜薯同香蒜薯蓉。首先送既麵包不錯吃;而塊扒亦好正,蟹腳啖啖肉好滿足,焗甜薯超甜,係個薯蓉麻麻;至於碟意粉普普通通,最後食剩半碟要打包。
2009年3月20日
松屋 - 銅鑼灣駱克道
每人平均$197
帥哥飯局第二回進化版,誠邀姊妹之一既ELLEN,一行四人揀左依間任飲任食港式日本料理。晚市放題時段為7點半至10點,我地早兩日訂左檯,今晚上到去見full晒唔接walk-in客。
整體食物水準不過不失,最正既係燒雞翼,任飲任食黎講算ok服務亦幾好,不過到9點半就要last order同埋單。
2009年1月31日
陸羽茶室 - 中環士丹利街
兩人共$248
同萊嫂出中環行街,行完H&M萊嫂話試下去陸羽飲茶。
去到唔駛等位仲有卡位坐,我地係第一次幫襯,有睇今期搵食男女介紹真正灌湯餃,再要個荷葉飯,蝦餃同以為係棉花雞。三款點心都好味,荷葉飯就普普通通,好間唔中黎飲下茶都唔錯。
2009年1月29日
北京酒樓 - 佐敦彌敦道
十人共$1,520
友好新春開年飯局,見依間有位便決定一試老牌北京菜,一行十大一細點左個八至十位用套餐。
套餐份量都幾多,至於食物味道就有好有唔好,但因要做兩輪檯生意(六點半同八點半),所以上菜速度好趕,逼住要快食。另外服務方面可以話係無服務,個人翻兜既機會唔大喇。
2009年1月24日
Ruby Tuesday - 沙田新城市廣場
每人平均$137
好友團年飯鼠年最終回,地點揀左沙田Ruby Tuesday,全因maymay入左會有折扣咭。
我地一行六大一細一坐低唔係點野食,而係派/收禮物時間,好開心今日又滿載而歸~ 講番食物味道幾唔錯,不過因一次過黎晒,搞到有d會凍左無咁好味,當然最緊要係有半價,好抵食呢~