萊BLOG萊

2012年7月6日
味一番- 尖沙嘴山林道
兩人共$697

今年的慶生飯揀左依間食個好幾次既日本料理店，一來d野0岩口味又唔算費，二來無咩idea試新野。
黎到見有新menu，菜式與之前差唔多，記得既係無左拉麵，而價錢就比之前貴20-30%。
先黎叫支清酒飲，然後要左d壽司，再加d燒物，最後整個冷蒿麥麵飽肚。
食物方面熟食保持水準，但壽司就好似差過以前少少，最大問題係加左價，即係由以前既唔算貴，到而家既有d貴。

2011年6月9日
鹿鳴春 - 尖沙咀麼地道
每人平均$290

鹿鳴春 / 鹿鳴春2 / 鹿鳴春3

2010年9月2日
La Maison - 灣仔汕頭街
兩人共$768

萊嫂慶生想食法國菜，上開飯dotcom見到依間新開有八個笑又幾抵食既上樓法國餐廳，就打電話訂檯。
由灣仔港鐵站行去五分鐘到，餐廳裝潢幾好氣氛，係檯與檯位置逼左少少，店員都幾親切，介紹菜式亦好詳細。menu上頭盤有十款、湯三款、主菜七款、伴碟三款及甜品九款，唔加一每人有最低消費$340。
首先黎既係麵包，配以牛油、鵝肝醬及香草魚醬，我認為配後者最好味；然後係杯加州紅酒，份量只得小半杯；前菜係焗田螺同煎鵝肝，兩款都好食由其係煎鵝肝面層有d燒焦0岩晒我口味；我地都揀左蟹湯，味道同龍蝦湯差唔多不過覺得d湯"鞋鞋"地；飲完湯有免費雪葩清清味蕾，今晚係紅莓味，但質感似碎冰；
主菜係安格斯肉眼扒配松露黑橄欖汁，及好期待既法式油鴨腿配青蘋果沙拉(因香港好少地方有得食油鴨腿)，牛扒要七成熟但外層乾左d同熟左少少，可能五成熟會好d，鴨腿外香內稔不錯吃；伴碟焗薯普普通通；

2010年5月29日
容記小菜王 - 深水埗福華街
每人平均$90

友人們台遊返黎派手信，揀左依間好人氣，一間鋪變三間鋪既容記小菜王飯聚。
我地先黎支特價啤酒同燒腩，再慢慢睇下有乜好食，最後叫左五食送一湯。當中只有碟雞係得既，再加個生炒骨叫ok，其餘既都係強差人意，老實講幾失望。
見大家都意猶未盡，原本想轉戰"賣豬仔"，但就俾場攔路雨淋熄左，齊齊被迫提早歸家，實在無癮。

2010年5月6日
聚德軒 - 尖東半島中心
每人平均$160

歡迎maymay日遊回來，主人家提議依間有666套餐食既酒樓。
點知原來就近母親節，$666套餐無左，只有兩款貴d既敬母宴，我地揀左較貴果個。最抵食係龍蝦伊麵(有3隻鉗)，其他都係一般，而d食送名都改得幾無厘頭。

2010年4月30日
賣豬仔 - 長沙灣順寧道
每人平均$200

藉世博開幕日重組帥哥飯局，小弟提議翻兜依間燒烤店，見上次(詳見這裡)黎時唔多人所以無訂檯，但估唔到依晚有幾張檯俾人訂左，坐落仲滿晒座添。
話說賣豬仔既前身係晌上環，上次黎時同店員傾計，佢話上環果邊較靜所以要搬，但搬左黎依度就俾樓上住客投訴，惟有要休店一陣子搞清件事先可以繼續做生意。
主角燒乳豬保持水準，燒魚亦唔錯，其他就無乜特別，店員見我拎相機影相，就送左碗豬骨粥，可能想我地幫佢宣傳下。
今晚借助唔少樽藍妹下，咱們帥哥仨把酒談心，不亦樂乎。

2010年3月30日
新樂海鮮酒家 - 佐敦彌敦道
每人平均$120

友達日遊回來派手信，相約依間幾就腳既酒家晚飯。
有人身體抱恙，所以點左d比較清淡既菜式，個人認為蒸魚最好味，其他都係普普通通，較特別係送既糖水有木瓜糖水。

2010年3月25日
大邊爐 - 九龍城城南道
兩人共$568

天氣轉涼，同萊嫂去打邊爐撐檯腳，見有友達食過依間評價唔錯，就早一晚book定檯。
首先啤一啤，啤酒只得喜力同藍妹，湯底揀左蕃茄雜菌蟹鍋，牛肉有幾款就叫店員介紹下，最後要左安格斯牛，仲有四寶丸、四式餃、三秒腐皮、炸魚皮同之後追加既炸芋頭。樣樣材料都幾好，價錢就偏貴，睇落唔係要左好多野但竟然飽到頂上個喉嚨。

2010年3月17日
蓮香居 - 上環德輔道西
每人平均$125

依星期出job上環，就相約友達去依間曾是人氣店既蓮香居晚飯，據聞蓮香居係傳統老店蓮香樓老闆親戚開既，所以在菜式上會好類同。
全晚菜式以八寶鴨最獲好評，其他都只係普普通通，至於最後送既糖水直頭要負分添。

2010年3月13日
和井鐵板燒 - 旺角通菜街
兩人共$716

早幾日想食鐵板燒，到今晚先有時間去食，依幾年食開既和三昧Dinner既話都會幾溶，所以近近地平平地出旺角食。
依間和井開張時幫襯過一次，今次我地點左個大蝦牛扒二人餐($398)，再散叫兩客大蟶子($110)同埋一客鵝肝($108)，仲有杯啤酒($25)。食材ok，但Serve我地既師傅手藝就麻麻地，不過整體黎講都幾滿足，走時仲俾左張九折咭我。

2010年2月20日
名苑酒家 - 尖沙咀柯士甸道
每人平均$320

與友好們吃虎年開年飯，團長提議依間名苑酒家，而我地就帶埋細b去逗利是。
新年流流大家都想食好d，揀左貴d果個全包宴半席，因為我地有七個人食，所以額外加多隻鮑魚。
d"食送"黎左幾味，最咀刁既友人已經話要帶老公黎食，而其餘都大致滿意。其實成餐飯最正既係有間房俾我地，坐得鬆動之餘亦無咁嘈雜，感覺良好，服務亦算ok。

2010年2月4日
錦丼鮪專門店 - 尖沙嘴iSQUARE
兩人共$282

去睇阿凡達前搵定有乜食，同層見到有三間日本野，分別係燒肉、丼同埋shabu放題，間燒肉價位唔平，而對shabu放題興趣唔大，所以就鎖定依間丼店。
睇完戲入座，見menu上既丼都幾多選擇，仲有d小食、刺身同壽司等，最後揀左海膽吞拿魚蓉丼(唔記得個原名)，萊嫂就要鰻魚丼。等左十分鐘鰻魚丼先黎，之後等多十分鐘輪到我個碗到，萊嫂話佢個鰻魚丼無乜特別，如果有d紫菜會好d，我試左兩啖覺得ok丫，至於個海膽吞拿魚蓉丼我就收貨，雖然d海膽唔係乜靚野，但d飯幾似樣係差左少少米香同埋都幾大碗飯，至於跟丼既麵豉湯同蒸蛋就無特別。
服務過得去，裝修好有日本feel，翻兜指數非常高。

2010年1月28日
鹿鳴春 - 尖沙咀麼地道
每人平均$255

與友好們食團年飯，今年就揀左鹿鳴春。
我地見個6-8人餐好似幾抵(唔記得係咪$1,4XX)，但出名咀刁既友人極抗拒套餐入面既炒蝦仁，就問部長有無得改，佢話可以改京燒羊肉，但我地有人唔好食羊，最後就再改賽螃蟹，而蒸素餃就改鍋貼，跟住又有人細細聲話唔知駛唔駛加錢，阿部長聽到就話無講即係唔駛加啦，難得對著我地d咁難服侍既都仲好好相與。
其實小弟都食過依間好幾次，一直都算滿意，今次走時仲打包左兩隻鴨殼，名副其實又食又拎。

2010年1月24日
榮川 - 銅鑼灣恒和鑽石大廈
兩人共$343

一路都想試依間以前係開晌酒店既日本料理店，早幾日睇搵食男女，主題係黑松露，當中介紹榮川有款黑松露蟹肉飯好正，就趁禮拜日印姐姐唔放假，同萊嫂去食lunch。
坐低先點左個黑松露蟹肉飯，因侍應話制作需時，然後晌lunch menu度揀左自選壽司set，再要左兩杯asahi($9杯)。
個飯等左陣就黎，侍應由個細鍋度"畢"d飯落隻碟度再撈勻，話係for兩人不過一個人都應該食得晒。飯都ok既，但入面d蟹肉就好韌要扣分。至於份壽司set只係不過不失，跟set既牛肉烏冬就好麻麻。
就黎食晒先醒起print左張開飯.com既coupon無拎出黎，可能係即燒關係，等左好耐兩串燒牛肋骨先整好，不過兩串牛都燒得過熟，如果唔係送既一定會要求換過。

2009年12月31日
PHO24 - 沙田新城市廣場
兩人共$219

今年最後一日要去大陸點貨，返黎時晌羅湖見只係五點鐘，就即call萊嫂去沙田食野行街，去試下依間又係睇搵食男女介紹，話晌越南好出名既新開越南粉店。
未夠六點去到唔駛等位，不過六點半後就見要等位喇。我地要左一碗河粉、炸春卷、炸雞翼，三色冰同埋拉椰糕，d野食唔得加上唔平，翻兜指數近乎零！

2009年12月30日
博多道場 - 尖沙咀金馬倫道
兩人共$395

繼續食日本野，其實兩日前已去左備長食串燒。
今次去試之前睇搵食男女介紹既新開日本食店，依度主打用備長炭既串燒同九州料理。
我地先order d串燒食下，咦？見d串燒好快就上檯個心已經沉一沉，之後食落口，嗯......唔係即燒喎，應該係預早燒熟到拎俾客前再整熱。對我黎講串燒如果係咁翻熱出黎，就算用料同火喉幾好都會扣好多分，實在係幾失望。

2009年12月18日
戶井北海道米比薩 - 尖沙嘴國際廣場
兩人共$325

好想食日本菜，順便逛下依個新商場，可能新開既關係，所有食店都大把位，亦都好落力咁拉客。商場內有唔少日本料理，但有部份仲未開，最後揀左依間戶井北海道米比薩，因有次晌沙田新城市見到想試下，不過要排隊所以放棄。
打開menu都幾多選擇，甜品個part好麻布茶房，價錢都係8毫尾，唔知係咪同一集團。食物味道ok，第一次食米pizza幾得意，不過就咬到個口有d攰，反兜指數幾高。

2009年12月12日
金山海鮮酒家 - 佐敦莊士倫敦廣場
每人平均$145

友好飯聚提早做冬，揀左依間就腳兼人氣海鮮店。
聖誕將至當然有交換禮物，是晚酒家座無虛席，更一同見證香港足球隊歷史奪金。
飯後餘慶在同一大廈的雀會竹戰，原來佢地飯前已打左幾圈，最後小弟只打個東圈就割禾青走先，然後去永安買野~

2009年10月26日
稻庭 - 九龍站圓方
兩人共$479

睇左意粉既食評幾吸引，趁重陽假期去試下，不過夜晚已full晒無得book，只好轉戰中午。
一早已決定食shabushabu，雖然中午食好似有d怪。揀左美國安格斯牛(每人$180)，佐賀和牛要每人$420！加碟腐皮($15)同主角稻庭烏冬($60)。
食材新鮮用料不俗，服務亦幾好，但無乜反兜既意欲。